Ekstraordinært årsmøte

Det vert kalla inn til ekstraordinært årsmøte i idrettsrådet tysdag 19. april kl. 19.00 i klubbhuset til Ørsta IL.

Sak:
Vurdering av ny plassering av fleirbrukshallen i sentrum.

Bakgrunn:
Idrettsrådet og kommunestyret har tidlegare gjort vedtak om bygging av fleirbrukshall på Mosflata, i samband med den nye idrettsparken der. Hallen er finansiert, og grunnen innløyst av kommunen.

Kommunestyret gjorde 31. mars vedtak om å vurdere alternativ plassering av fleirbrukshallen.

Administrasjonen i kommunen meiner det er nye moment i saka, og finn at plassering ved utstillingsplassen er betre. Klubbhuset til ØIL vil då bli fjerna, og aktivitetane der bli integrert i den nye hallen.

Skulane er svært motvillige til å krysse elva, og vil ha hallen på grusbana. Administrasjonen meiner også at det er nok areal her til seinare utviding av hallen. Nytt symjeanlegg er tenkt tilknytt hallen, om den blir plassert på utstillingsplassen.

Administrasjonen meiner også det vil bli billegare for kommunen å byggje på utstillingsplassen, og at prosjektet ikkje blir særleg forsinka (ca. 6 mnd.) av å endre plassering.

Idrettsparken på Mosflata vil uansett vere for idretten. Her vil det etter kvart bli tilbod om ei rekkje anlegg, m.a. ny fotballbane (eller fotballhall?). Hestesportanlegg på Mosflata blir også vurdert.

Det er påstand om at Fylket vil bidra mykje meir økonomisk om hallen vert bygd på utstillingsplassen. Ordførar/rådmann vil prøve å skaffe meir dokumentasjon om dette til møtet vårt 19/4.

Det vil også bli utarbeidd nye planskisser, også i 3D.

Idretten må ta stilling til om det for idretten er betre med plassering av fleirbrukshall på utstillingsplassen enn på Mosflata, eller om vi skal halde fast på dei vedtak som er gjort om plassering.

Kommunestyret skal gjere endeleg vedtak om plassering i kommunestyremøtet 21. april. Møt opp også der!