Ørsta idrettspark AS

Ørsta idrettspark AS (ØIP) er eigd av Ørsta idrettsråd og Ørsta kommune. Etter vedtak i kommunestyret i november 2018 har idrettsrådet (altså idretten i Ørsta kommune) aksjemajoritet i selskapet.

ØIP vart oppretta for å prosjektere fleirbrukshall på Mosflata. Hallprosjektet vart flytta til utstillingsplassen, men mykje av prosjektet er vidareført frå Mosflata. Funksjonen til ØIP er no først og fremst knytt til investering i utstyr til den nye Ørstahallen. Og her er det ei lang ønskeliste! ØIP har framleis nokre millionar til disposisjon, etter å ha brukt fleire millionar allereie. ØIP har m.a. investert i ekstra tribune, nedsenkbar trampoline og løpedekke mellom hallen og utetribune. Midlane i ØIP er gåvemidlar frå næringslivet og løyvingar frå kommunen.

I løpet av juni skal kommunestyret gjere vedtak om den vidare drift av selskapet. Idrettsrådet meiner ØIP kan ha ein funksjon i samband med drift av fleirbrukshallen. Det har ikkje vore administrative kostnadar ved drift av ØIP, her har det vore feilinformasjon både i kommunestyret og i lokalavisa. Selskapet er drevet av idealistar som nyttar fritida til beste for idretten (og ålmenta).

Styret i ØIP består av Gunnar Knutsen (styreleiar), Patricio Medina og Trine Skjeret. Dagleg leiar Olav Aambøe.