Medlemsmøte

Invitasjon til medlemsmøte om Ørstahallen

Tid: torsdag 13. desember, kl. 19 – 21.
Stad: det mellombelse klubbhuset til Ørsta IL, mellom Kiwi-hallen og stadion.

Sak:
Det nærmar seg opning av den nye Ørstahallen. Er idretten klar for å ta i bruk den nye storstova?

I møtet vil ein få meir informasjon om hallen, og det blir lagt opp til diskusjon. Fleire tema er framleis ikkje heilt på plass.

Aktuelle tema:

Opningshelg 26-27. januar. Idretten er invitert til å stille med variert program. Det er m.a. terminfesta fleire handball-kampar. Sjølve opningsfesten vert på søndagen kl. 16 – 18. Ein kjendis skal klippe snora, det blir talar, musikk og litt av kvart…

Ørstahallen er på 8500 m², og inneheld: Klatrehall med buldring og tau-klatring. Tre speleflater for handball, innebandy, futsal, volleyball, basketball, turn m.m. Treningsrom for bordtennis, dans, barneidrett m.m. Styrketreningsrom (med apparat frå tidlegare Ørsta gym). Løpebane med hoppegrop for friidrett. Hallen har 5 garderobesett. Her er også tribuneanlegg og vrimleareal for publikum. Kjøken/kiosk oppe og nede, og klubblokale for ØIL i andre høgda. Der er møterom av ulik storleik, samt 4 klasserom som Velle skule skal nytte frå neste haust.

Hallen skal vere open 11 mnd. I året. For idretten vil den vere disponibel på kvardag frå kl. 16 – 22, og i helg kl. 11 – 17. I utgangspunktet er helg reservert for kamp/arrangement, idrettsrådet har meldt inn behov for å nytte helg til trening også.

Kommunestyret har gjort vedtak om leigepris. Har idretten råd til å bruke hallen så mykje som vi ønsker? 

Ørstahallen er for heile kommunen. I kva grad ønsker laga utanfor sentrum å nytte hallen?

Hallen opnar for nye tilbod i kommunen. Så langt er innebandy og turn klare til å starte opp, og bordtennis er på gang. Uorganisert aktivitet (som «Young active») bør vi prøve å få til. Kanskje nokon har fleire gode forslag til ny aktivitet?

Det er ingen kommunalt tilsette i hallen på kveldstid eller helg. Det er forslag om at idretten stiller med hallverter. Dei skal då ha ein slags vakt-funksjon, gi informasjon, og hjelpe til med tøming av bygget i samband med stenging. Det er tenkt at det skal vere ein slags turnus mellom brukarane om denne ordninga. Er dette ei ordning vi kan støtte, er det realistisk å få nok frivillige til dette?

Tildeling av treningstid. Dette blir meir omfattande og komplisert enn tidlegare. Det er kanskje behov for å utvide hallnemnda, og at denne har fleire møter gjennom året. Idretten bør vel vere representert gjennom idrettsrådet som tidlegare?
Ulike idrettar vil ha ulike periodar i hallen, det er truleg svært få idrettar som vil leige halltid i 11 mnd.

Kommunestyret har bestemt at drift av hallen skal gjennom evaluering i løpet av 2019.

Ørsta idrettspark AS (ØIP) er eigd av Ørsta kommune og Ørsta idrettsråd. ØIP vart etablert for å prosjektere fleirbrukshall på Mosflata. Kva skjer med selskapet framover? Det er tankar om at ØIP kan ha ein funksjon i samband med drift av hallen. Midlar i selskapet vert no brukt til investeringar tilknytt hallen, tiltak som ligg utanfor budsjettet til prosjektet. Kanskje ØIP kan ha ein funksjon opp mot næringslivet? Hjelpe til med organisering av større arrangement?

Fleire tema kan dukke opp til møtet, fleire politiske prosessar går føre seg no.

Målet med møtet er å bli betre kjend med det nye tilbodet, og diskutere gjennom tema som ikkje er heilt avklara enno.

Vel møtt!